Körpüləri, tunelləri dib-dibə Bakının hər tini qəza alanıdır. Hər gün ölüm, itim. Sanki tv-lər (yaxşı ki saytlar hələ bu yarışa qoşulmayıb) avtomobil qəzaları üzrə informasiyaların sayına, qorxulu kadrların seçiminə görə Ginnesin “Rekordlar” kitabına düşmək üçün yarışırlar.
Kriminal verilişlərdən ötə xəbər proqramları qəzalar, ölümlər üzrə informasiyaların ilkin yayımında liderdirlər. Siyasi, iqtisadi, sosial mövzulardan fərqli bu xəbərlərdə operativlik, obyektivlik qorunur. Xəbərçiliyin iki əsas yolu var: xəbər özü yaranır və xəbəri sən yaradırsan. “Şükür Allaha” Azərbaycan kriminal xəbərlərlə zəngin ölkədir. Xəbər yaratmağa gərək qalmır. Bu zənginliyin artmasında, qorunmasında hakimiyyətin, hakimiyyətin müxtəlif qollarının ayrıca rolu var. Hakimiyyətin rolu deyəndə pul, para içində boğulan adamların saman çöpünün ümidinə qalmasını nəzərdə tuturam. Adamları illərlə pullandırıb sonra qazandıqlarını əllərindən almaq üçün türməyə atdırmaqlar var ha, onu deyirəm. Kim inanardı ki, “Xəzər adaları”nın fatihəsi “bandotdel”də veriləcək?! Kimin ağlına gələrdi ki, Londonun bahalı hotellərində düzənlənən tədbirlərdə modelçi pozalarla şəkil çəkdirib AzTV-də süjetlər verdirən “manekenlər” aldıqlarını, gördüklərini unudacaqlar. Illərin xidmətini bir andaca silib atacaqlar. Şok, şok! Qabaqca athaatdı. Indi tuthatutdur. Sonra gethaget olacaq. Ayaqqabı qutularından (Türkiyədəki kimi) tapılan pullar Avropa Oyunları adına yığılandan sonra hamısını açıb buraxacaqlar. Baltakəsməz pullular ömürlük cəza alası olsa bura Azərbaycan olmaz ki! Intiqam Əliyevləri saxlayan türmə Hacı Ibrahimi saxlamaz . Saxlasa, Can Azərbaycan olar. Əslində tərsinə olmalıdır. Intiqam müəllimlərin yerində bunlar oturmalıdır. Amma mənim işim bunlarla deyil. Akulalar, balinalar “Nemoları” yemək üçündür, nuş olsun. Qarşılıqlı “yemələrin” sonuna varacağız. Avropa Oyunları adına yığılan, yeyilən pulların da səsi çıxacaq. “Isgəndərin buynuzu var” deyən mütləq olacaq.
Çox istərdim Avropa Oyunlarına hazırlıq üzrə təşkilat komitəsi standionların, idman qurğularının, hotellərin hesabına milyardlar sildiyi kimi yeni stadionların yaxınlığında tam təminatlı bir xəstəxana da tikdirib o milyardların sayını artıraydı. Məsələn, Sabunçudakı 3 saylı xəstəxananın yerində. Üzünü görməsəm də ekrandan tanıdığım 3 saylı xəstəxanadan zəndeyi zəhləm gedir. Həkimlərinə qanım qaynamır. Ən çox ölüm xəbəri ordan çıxır. Öz xoşumla dünyasında yardım üçün ora getmərəm. Bu xəstəxana avtomobil qəzalarının ən çox baş verdiyi yerlərə yaxın ərazidə yerləşir. Paytaxtın sonu ölüm olan ağır qəzalarının statistikasında aeroport yolu birinci yerdədir. Yol da Sabunçu rayonunda, xəstəxana da. Yönü Bakı kəndlərinə yollarda qəzaya düşənlərin azı salamat çıxır bu xəstəxanadan. Orda qərarları “Əzrayıl” verir. Ölüm var ölüm kimi, ölüm var zülüm kimi. 3 saylı xəstəxanaya düşmək zülümlə ölmək deməkdir. Ekranda gördüklərimə əsasən, buranın ilk tibbi yardım məntəqəsi səviyyəsində olduğunu düşünürəm. Ölümlərin sayını azaltmaq üçün standartlara uyğun, savadlı və peşəsinə fədakarcasına sayğılı həkimlərin çalışdığı bir xəstəxana açılmalıdır burda. Indiyəcən açılmalıydı. Azından, Avropa Oyunlarına gələn xaricilərin canı xatirinə. Bu həndəvərdə hansısa qəza keçirən qonağa 3 saylı xəstəxanada analgin-dimedroldan savayı nə yardım göstəriləcək. Hörmətli qonaqları Klinik xəstəxanaya çatdırınca iş-işdən keçə bilər. Deməyin nəs danışır. Bu çalıb-oynamağın bir ağlamağı da ola bilər, ya yox. Bilinmir, rayonlarda tikilən olimpiya mərkəzləri kimi bu yekə standionlar da nə qədər boş qalacaq. Onların həndəvərində samballı bir xəstəxana tikilsəydi, əmin olun, boş qalmazdı. Avropa Oyunlarının xeyrini görərdik. Cənab Əzrayılda da gedib ayrı yerdə məskən salardı. O xəstəxanadan salamat çıxanlar da “Isgəndərin buynuzu var” xəbərini bunca maraqla gözləməzdilər.
A.Türkoğlu