Əli Kərimli: “Bu qətnamə tarixi həqiqətləri təhrif edən, qərəzli və siyasi cəhətdən zərərli bir sənəddir”
Milli Şura Avropa Parlamentinin qondarma erməni soyqırımını tanıyan qətnaməsinə qarşı etiraz bəyanatı verib. Bəyanatda deyilir:
Avropa Parlamenti aprelin 15-də “erməni soyqırımı” iddiasını müzakirəyə çıxararaq, bunu tarixi gerçəklik kimi tanıyan qətnamə qəbul edib.
Azərbaycan Demokratik Qüvvələrinin Milli Şurası bunu pisləyərək bəyan edir ki, qəbul olunmuş qətnamə tarixi həqiqətləri təhrif edir və qərəzlidir. Bu qətnamə Türkiyə və Azərbaycana qarşı erməni lobbisinin uzun illər ərzində apardığı işin nəticəsində meydana çıxıb. Belə bir sənədin qəbulu Avropa Birliyinin öz maraqlarına, dəyər və prinsiplərinə də ziddir. Bu qətnamə müəyyən bir etnik lobbinin öz maraqlarını ümumun maraqlarından üstün qəbul etdirə bilməsinin klassik nümunəsidir. Bir daha bəyan edirik ki, bu sənəd ermənilərin maraqlarına uyğun olsa da, Avropa Birliyinin maraqlarına uyğun deyil.
Açıq etiraf etmək lazımdır ki, belə bir sənədin ərsəyə gəlməsinə görə Azərbaycan və Türkiyə hökumətləri də müəyyən məsuliyyət daşıyırlar. Ermənilərin bu saxta genosidin 100 illiyinə hazırlaşdıqları, bunun üçün xüsusi təşkilat komitəsi yaratdıqları neçə il qabaqdan bəlli idi və erməni lobbisinin bu istiqamətdə dünya çapında hansı həmlələr edəcəyini hər iki ölkənin rəhbərliyi bilməmiş deyildi və ya proqnozlaşdırmağa borclu idi. Təəssüf ki, nə Türkiyə, nə də Azərbaycan hökumətinin beynəlxalq səviyyədə erməni lobbisinin bu fəaliyyətinə qarşı daha sistemli, ardıcıl, koordinasiya edilmiş fəaliyyəti müşahidə edildi.
Azərbaycan hökuməti və rəsmiləri hazırda bu qətnamədən istifadə edərək, Avropa Parlamenti və bütövlükdə Avropa Birliyinə qarşı kampaniyanı gücləndirir və gücləndirəcək. Milli Şura hesab edir ki, bu, heç bir halda səmimi sayıla bilməz. Azərbaycan hökuməti bu etirazlarında səmimi olsaydı, “erməni genosidi”ni indiyədək tanımış dövlətlərə, o cümlədən bunu 1995-ci ildən etmiş Rusiyaya qarşı da ciddi təpki göstərərdi, xarici siyasətində bunu nəzərə alardı. Bunu etməyibsə və xüsusi dostluq münasibəti qurduğu Vatikan da Papa Fransiskin simasında “erməni genosidi”ni tanıyan bəyanat veribsə, deməli, onun xarici siyasətində milli maraqlar aparıcı olmayıb və “erməni genosidi”nə qarşı sistemli iş aparılmayıb. Sadəcə, Avropa Parlamenti daha əvvəllər Azərbaycan hakimiyyətindən demokratik islahatlar və siyasi məhbuslara azadlıq tələb etdiyi üçün ona qarşı bu səhvdən istifadə edərək, müəyyən kampaniya aparılaır.
Azərbaycan demokratik qüvvələrinin Milli Şurası hər zaman xalqın maraqlarından çıxış edir və edəcək. Bizim ayrı-ayrı dövlətlərə, beynəlxalq təşkilatlara və siyasi institutlara münasibətimiz ilk növbədə onların Azərbaycan xalqına, hüquqa və demokratik prinsiplərə münasibətinə görə müəyyənləşir. Avropa Parlamenti və ya digər bir qurum Azərbaycanın maraqlarına uyğun, ərazi bütövlüyümüzü və ölkəmizdə demokratik islahatları dəstəkləyən addımlar atdıqca və qərarlar verdikcə, biz bu addım və qərarları dəstəkləyəcəyik. İndiki halda olduğu kimi, hansısa lobbi qruplarının təsiri altında Azərbaycanın milli maraqlarına uyğun olmayan qərəzli və siyasi cəhətdən zərərli qərarlar qəbul edilən zaman isə Milli Şura bunu pisləməkdə heç zaman tərəddüd etməyəcək.
***
Qəbul olunmuş qətnamə ilə bağlı AXCP sədri Əli Kərimli də Facebook səhifəsində mövqeyini açıqlayıb. Onun fikirlərini təqdim edirik:
Bu qətnamə uzun illər ərzində aparılmış birtərəfli erməni təbliğatının təsiri altında qəbul edilmiş, tarixi həqiqətləri təhrif edən, qərəzli və siyasi cəhətdən zərərli bir sənəddir. Belə bir sənədin qəbulu ən azı Türk və müsəlman aləmində Avropa Birliyi Parlamentinin özünün imicinə vurulmuş ciddi zərbədir.
Milli Şura üçün Azərbaycan xalqının maraqları hər şeydən öndə gəlir. Bizim Avropa Birliyi ilə inteqrasiya tərəfdarı olmağımız qətiyyən elə başa düşülməməlidir ki, biz AB-nin istənilən addımına haqq qazandıracağıq və ya xalqımızın maraqlarına zidd fəaliyyətlərə susacağıq. Qətiyyən. AB Parlamentinin ərazi bütövlüyümüzə dəstək verən, insan hüquqlarını müdafiə edən qətnamələrini doğru bilib dəstəklədiyimiz kimi, uydurma erməni genosidi haqda qətnaməni də yanlış bilib, uca səslə tənqid edirik. Biz məhz xalqımızın daha yaxşı, azad və firavan həyat yaşaması üçün ölkəmizdə Avropa standartlarının tətbiqini, ölkəmizin tədricən bu quruma inteqrasiyasını istəyirik. Amma hər kəs bilməlidir ki, biz bu quruma öz milli və mənəvi dəyərlərimizi qoruyaraq inteqrasiya olunmaq istəyirik. Nə milli dəyərlərimizdən, nə də dini kimliyimizdən nələrinsə naminə imtina etmərik (hərçənd bilməlisiniz ki, bunu heç istəyən də yoxdur).
Heç şübhəsiz ki, rejim bu qətnamədən sui-istifadə edərək Avropa Birliyinə qarşı kampaniyasını körükləyəcək. Səmimi deyillər. Anti- Avropa kampaniyasını heç də “erməni genosidi” qətnaməsinə görə aparmırlar. Dərdləri odur ki, Avropa Birliyi Parlamenti dəfələrlə Azərbaycandakı rejimdən siyasi məhbusların azad edilməsini, ölkədə demokratik islahatlar aparılmasını tələb edib.
Yoxsa, Rusiya parlamenti həmin uydurma genosidi 1995-ci ildən tanıyıb, gərək ona qarşı da kampaniya edəydilər. Üstəlik Rusiya Ermənistana 2 milyard dollarlıq silah da bağışlayıb. Xocalı faciəsində, Qarabağın işğalında, 20 Yanvardakı rollarını da hamınız bilirsiniz. Hökumət bu qədər ermənipərəst addımlara görə Rusiyaya qarşı cınqırını çıxarıbmı?
Fransa nəinki bu uydurma genosidi tanıyıb, hətta “erməni genosidini” inkara görə cinayət məsuliyyəti də nəzərdə tutub. Bəlkə Fransadan aldıqları yüksək medallardan imtina ediblər, xəbərimiz yoxdur? Yeri gəlmişkən, o zaman da biz Fransa parlamentinin bu qərarını sərt tənqid etmişdik.
Vatikanın yarısını bunlar təmir etdiriblər. Bilmirdilər ki, Vatikan hələ 2000-ci ildə bu uydurma “erməni genosidi”ni tanıyıb? Ümumrusiya Patriarxı Kirill 2010-cu ildə bu uydurma genosidi tanıyanda səsləri çıxdımı? Bəlkə Roma Papasını olmayan genosidi tanıdığına görə tənqid ediblər, xəbərimiz yoxdur?
Sözümün canı odur ki, bunların türk, müsəlman təəssübkeşliyindən danışıb, timsah göz yaşları axıtması gərək heç kimi aldatmasın. Bu xalqın milli və dini kimliyinə, hətta mentalitetinə bunlar qədər kim zərbə vurub? Bu hökumət üçün heç vaxt milli maraqlar kreslo, vəzifə marağından üstün olmayıb. İndi başlatdıqları kampaniya da laxlamaqda olan kürsülərini bərkitmək üçündür. Biz isə Azərbaycan siyasətində yalnız ona görə varıq ki, xalqımıza xidmət edək. Xalqımızın, dövlətimizin milli maraqlarına qarşı çıxış edən kim olur-olsun, bizi qarşısında görəcək!