«Mc Donald’s» rəhbərinin oğlunun ölümünə səbəb olan qəzada avtomobil 180-200 km/saat sürətlə gedirmiş…
Bakının Səbail rayonunun icra başçısı Asif Əsgərovun 1998-ci il təvəllüdlü oğlu Ilham Əsgərli dünən Bakı Ağır Cinayətlər Məhkəməsində təqsirləndirilən şəxs qismində ifadə verib. Söhbət ötən il sentyabrın 29-da baş vermiş və “Mc Donald’s”ın Bakı nümayəndəliyinin rəhbəri Maqsud Mirzəyevin oğlu Sənan Mirzəyevin ölümünə səbəb olmuş yol qəzası üzrə məhkəmə prosesindən gedir.
Qeyd edək ki, Ilham Əsgərlinin idarə etdiyi “Mercedes S500″ markalı avtomobil Zığ-aeroport yolunda Əhliman Süleymanovun idarə etdiyi ”Howo” markalı yük maşını ilə toqquşub. Həmin vaxt Ilham Əsgərlinin sürücüsü Pərvin Fətullayev də maşında olub. Qəza nəticəsində Ilham Əsgərli özü və Pərvin Fətullayev xəsarət alıb, onlar bu gün də əl ağacı vasitəsilə hərəkət edirlər, Sənan Mirzəyev isə dünyasını dəyişib.
Ilham Əsgərli ilə yanaşı, Əhliman Süleymanov da təqsirləndirilən şəxs qismində məhkəmə qarşısına çıxarılıb. Onların hər ikisinin barəsində məhkəmə hökm verənə qədər ev dustaqlığı qətimkan tədbiri seçilib. Dünənki məhkəmə iclasında həm Ilham Əsgərli, həm də Əhliman Süleymanov dindirilib.
Ilham Əsgərlinin deyib ki, qarşıda gedən “Howo”nu ötmək istəyərkən, yük maşını qəfildən sağa dönüb və bu səbəbdən hadisə baş verib. Onun sözlərinə görə, həmin yerdə dəmir maneələr götürülərək, qanunsuz dönmək üçün imkan yaradılıb və yük maşını da oradan dönmək istəyirdi.
Əhliman Süleymanov isə icra başçısının oğlunun dediklərini təkzib edib. Deyib ki, həmin vaxt şirkətə məxsus üç yük maşını bir-birinin ardınca hərəkət edib: “Mənim arxamca Nurlanın, onun arxasınca isə Ayazın sürdüyü maşın gəlirdi. Mənim qarşımda da bir ”ZIL” gedirdi. Mən yolun sağı ilə 50-60 km. sürətlə gedirdim. Qarşımdakı “ZIL”i keçmək üçün işıqları yandırıb, sola çıxırdım. Bu vaxt arxadan sürətlə gələn “Mercedes”in “marqat” eləyib, yol istədiyini gördüm. Yenidən “povarotnik”i sağa yandırdım ki, sağa çıxıb ona yol verim. Həmin vaxt avtomobil mənim maşınımın arxa sağ təkərinə çırpıldı. Mənim sağda guya, hansısa keçiddən dönmək istədiyim barədə deyilənlər doğru deyil”.
Əhliman Süleymanov onu da qeyd edib ki, “Mercedes” saatda təxminən 180-200-lə hərəkət edirmiş: “O qədər böyük sürət vardı ki, zərbədən mənim sürdüyüm 15 tonluq yük maşınını qaldırıb, yol kənarındakı dəmirləri sındırmaqla qumsallığa tulladı.
Dünənki məhkəmə iclasında şahid ifadələri də dinlənilib. Şahid ifadələrindən də məlum olub ki, Ilham Əsgərlinin idarə etdiyi avtomobil çox yüksək sürətlə hərəkət edirmiş. Həmçinin şahidlər Təcili Tibbi Yardımın hadisə yerinə gec gəldiyini bildiriblər.
“Mən gələndə yaralıları çıxarmışdılar. Biri lap ağır idi. Təcili Yardım gec gəldiyi üçün yaralıları özümüz maşına qoyaraq, xəstəxanaya aparmaq istəsək də, polislər icazə vermədi, dedilər ki, təcili yardımı gözləməliyik”, – deyə yük maşınlarının məxsus olduğu şirkətin rəhbəri, qəzadan dərhal sonra hadisə yerinə gəlmiş Nizami Aslanov məhkəmədə bildirib.
Hadisə baş verərkən Əhliman Süleymanovun idarə etdiyi avtomobilin arxasınca hərəkət edən iş yoldaşı Nurlan Məmmədov ifadəsində göstərib ki, qəza baş verərkən “Mercedes” saatda təxminən 180-200 km. sürətlə gedirdi: “Mən Əhlimanın arxasınca gedirdim. Aramızda təxminən 50 metr məsafə olardı. Əhlimanın qarşısında isə ”ZIL” gedirdi. Əhliman onu ötmək üçün işıqları yandırıb sola çıxdı. Bu zaman arxadan sürətlə gələn “Mercedes” “marqat” eləyib yol istədi. Həmin vaxt “Mercedes” məndən də təxminən 200 metr arxada olardı. Bunu görən Əhliman yenidən sağ yola qayıdıb ona yol vermək istədi. “Mercedes” o qədər sürətlə gəlirdi ki, məndən də 200 metr arxada olan maşın bir neçə saniyənin içində Əhlimana çatıb, sağ tərəfdən ötmək istəyəndə yük maşınının sağ arxa təkərinə çırpıldı. Təsəvvür edin, “Mercedes” yük maşınını bir tərəfi üstə hava qaldırıb, yol kənarındakı dəmirləri sındırmaqla qumsallığa atdı. Özü isə arxası dəmirə tərəf qalxıb qaldı. “Mercedes”in mühərrik hissəsində yanğın başladı. Mənim maşınımda su vardı, töküb birtəhər söndürdük. Sonra yaralıları çıxardıq. Sürücü tərəfdən qapı açılmadı. Sürücünün yanında əyləşmiş cavan uşağın vəziyyəti lap ağır idi. Birinci onu çıxartdıq, sonra arxadan bir dolu oğlanı çıxartdıq. Təcili yardım gec gəldi – təxminən 40 dəqiqəyə. Birinci gələn təcili yardım vəziyyəti ağır olanı apardı, ikinci gələn həmin o dolu oğlanı. Daha sonra qara rəngli bir avtomobil gəldi və sürücünü o apardı”.
Sözügedən qəzada oğlunu itirmiş Maqsud Mirzəyevlə şahid arasında bu yerdə belə bir sual cavab olub:
– Sürücünü aparan nə maşın idi?
– Deyəsən, “Hyundai” idi.
– Hökumət maşını idi? Seriyası “AA” idi?
– Bəli.
Qeyd edək ki, Maqsud Mirzəyev ötən məhkəmə iclaslarında da Asif Əsgərlinin yaxınlarının hadisədən sonra onun oğluna fərqli münasibət göstərməsindən gileylənmişdi. Onun sözlərinə görə, Ilham Əsgərli və sürücüsü əvvəlcə Kliniki Tibbi Mərkəzə (“Semaşko”), oradan da Istanbula aparılıb. Amma onun oğlu Sabunçu xəstəxanasına aparılıb və orada da baxımsız, kimsəsiz vəziyyətdə qalıb. Hadisə zamanı Nyu-Yorkda olmuş Maqsud Mirzəyevi narazı salan da məhz budur.
Məhkəmə prosesi sabah davam edəcək.