Qarabağda Rusiya sülhməramlı qüvvələrinin rəhbərliyi Qarabağda vəziyyət barədə hər gün Moskvaya məlumat verməyi vəd edib, bunu sülhməramlı qüvvələrin komandanı Aleksandr Lentsovla görüşdən sonra dövlət naziri Qurqen Nersisyan deyib.
“Onlar [sülhməramlılar] indən belə, xalqımızın tələbi və gələcək addımlarını nəzərə alaraq, gündəlik rejimdə hər saat vəziyyət barədə Moskvaya məlumat verməyi öhdələrinə götürüb və etiraf ediblər ki, gərək vəziyyətin dərhal tənzimlənməsi və humanitar böhranın ləğv edilməsi istiqamətində işləsinlər”, – Nersisyan deyib.
Cümə günü Qarabağda yaşayan ermənilərin “Laçın dəhlizi üzərindən blokadanın açılması” tələbi ilə müddətsiz mitinqi başlayıb.
Nersisyan elan edib ki, nümayişçilərin bir hissəsi aksiyanı davam etdirmək üçün Stepanakertə, Dirçəliş meydanına qayıdacaq, qalanı isə, xüsusən Əsgəran rayonunun sakinləri, aksiyanı Rusiya sülhməramlı qüvvələrin yerləşdiyi ərazinin yaxınlığında qurulmuş çadırlarda davam etdirəcəklər.
Nersisyan Dirçəliş meydanında da çadırlar qurulduğunu bildirib.
Mitinqdə çıxış edənlərin sözlərinə görə, artıq 7 aydır ki, Azərbaycan Laçın dəhlizini bağlayıb, son ayda isə Laçın dəhlizi ilə “bütün növ yüklərin, o cümlədən ən zəruri malların Ermənistandan gətirilməsini qadağan edib”. Onlar Qarabağda “humanitar fəlakət təhlükəsinin” olduğunu deyiblər.
Rəsmi Bakı Qarabağda humanitar böhran yaranması iddialarını rədd edir.
Mitinqdə separartçı Dağlıq Qarabağ Respublikasının rəhbərliyi də iştirak edir.
“Dağlıq Qarabağ xalqının tələbi yerinə yetirilməyincə – Laçın dəhlizi üzərindən maneəsiz hərəkət bərpa olunmayınca – aksiyanın davam etdiriləcəyi” bildirilir.
Aprelin 23-də Azərbaycan Laçın dəhlizi üzərində, Ermənistanla sərhəddə öz sərhəd-keçid məntəqəsi qurandan sonra Qarabağ erməniləri iyunun 15-də baş vermiş insidentə qədər Ermənistana gedib-gəlmək üçün bu yoldan istifadə edirdilər.
Həmin gün bir Azərbaycan əsgəri Ermənistanla sərhəddə, Laçın keçid məntəqəsində yaralanmış, bundan sonra gediş-gəlib dayandırılmışdı.
İyulun 11-də isə Azərbaycan Dövlət Sərhəd Xidməti bildirib ki, Beynəlxalq Qızıl Xaç Komitəsinə (BQXK) məxsus tibbi təxliyyə avtomobillərində Ermənistandan Qarabağa “qanunsuz olaraq mobil telefonların, siqaret və avtomobil yanacağının daşınmasına” cəhd edilib və buna görə də Laçın sərhəd buraxılış məntəqəsi “müvəqqəti olaraq” bağlanıb.
BQXK bunu təkzib etməyib və həmin maşınların sürücüləri ilə əməkdaşlığa son verdiyini bildirib.
Cümə günü Azərbaycan xarici işlər naziri Ceyhun Bayramov BQXK-nın Azərbaycandakı nümayəndəliyinin rəhbərliyi ilə görüşündə deyib ki, Qarabağ ermənilərinin “tibbi məqsədlər üçün Laçın sərhəd məntəqəsindən keçidinin davam etməsi mümkündür”.
Ceyhun Bayramov, həmçinin BQXK-ya Qarabağda erməni sakinlərin tədarük ehtiyaclarını təmin etmək üçün Ağdam-Xankəndi yolundan istifadəni də təklif edib, Azərbaycan XİN bildirib.(BBC.com)