FLAŞ:

“Nərgiz” Mükafatı Mehman Hüseynova Verildi

Dekabrın 27-də Müsavat Partiyasının qərargahında Nərgiz Yaqublunun xatirəsinin əbədiləşdirilməsi məqsədilə təsis olunmuş “Nərgiz” mükafatının təqdimat mərasimi keçirilib.
Öncədən keçirilən gizli səsvermənin sonuclarına görə bu il mükafat həbsdə olan jurnalist, bloger Mehman Hüseynov layiq görülüb. Mükafat jurnalistin valideynləri Rafiq Hüseynov və Firəngiz Hüseynovaya təqdim olunub. Bloger Eltac Turan Türkün Mehman Hüseynov haqqında hazırladığı video-çarx nümayiş etdirilib.
Tədbirdə Milli Şuranın sədri Cəmil Həsənli, AXCP sədri Əli Kərimli, Nida Vətəndaş Hərəkatının təmsilçisi Samir Əsədli, D18 təşkilatının sədr müavini və mükafat komissiyasının üzvü Samirə Ağayeva və “heykəl məhbusu” Qiyas İbrahimovun anası Şura Əmiraslanova çıxış ediblər. Çıxışlarda mərhum müsavatçı Nərgiz Yaqublunun keçdiyi şərəfli mübarizə yolu yad edilib, hakimiyyət repressiyalarına rəğmən mübarizə aparan gənclərin fədakarlığı qiymətləndirilib. Mehman Hüseynovun hakimiyyətin korrupsiya fəaliyyətini ifşa edən materialları xatırlanıb, onun bu mükafatı haqq etdiyi qeyd edilib.
Qeyd edək ki, “Nərgiz Mükafatı” 2015-ci ildə Nida Vətəndaş Hərəkətının təmsilçisi – vicdan məhbusu İlkin Rüstəmzadəyə, 2016-cı ildə isə “heykəl məhbusları” kimi tanınan Qiyas İbrahimov və Bayram Məmmədova verilib.