FLAŞ:

Tapdanmış Bir Sahiləm…

Akif Əhmədgil

Tapdanmış qumlu sahil dənizin dodağımı?..
Dalğalar yorğun düşər sahilin qollarında.
Su kimi keçən ömür bir eşqin sorağımı?..
Tapdanmış bir sahiləm həsrətin yollarında.

Dodağından bal çəkim dənizin dodağına,
Gözləyirəm nə vaxtdır dodağından söz düşə…
Məni atıb getmisən hicranın qucağına –
Baxıram, ilğım kimi qumluqlara iz düşə….

Mən baş aça bilmirəm dənizin dediyindən,
Su pərisi anlayar dənizin dillərindən…
Hüzuruna gəlmişəm dağların gədiyindən –
Tapdanmış bir sahiləm həsrətin yollarında…