Mixail Saakaşvili Gürcüstanda saxlanılaraq həbd edilib.
Gürcüstanın keçmiş prezidentinin tutulması barədə məlumatı ilk olaraq Baş nazir İrakli Qaribaşvili keçirdiyi brifinqdə bildirib:
“Gürcüstanın üçüncü prezidenti Mixail Saakaşvili saxlanılıb və cəzaçəkmə müəssisəsinə köçürülüb. Hüquq-mühafizə orqanlarının əməkdaşları həbs prosedurunu ən yüksək səviyyədə həyata keçiriblər”.
Xatırladaq ki, M.Saakaşvili həbs edilməzdən əvvəl feysbuk hesabında video yayaraq Batumi şəhərində olduğunu açıqlamışdı. O, gürcü xalqına videomüraciətində bildirmişdi:
“Böyük ehtimalla, məni indi Tbilisidə tutacaqlar. Ancaq demək istəyirəm ki, heç nədən qorxmayın və sabah seçkilərə gedin və səsinizi verin. Ayın 3-də hamımız birlikdə qələbəmizi qeyd edəcəyik. Mən sizə kömək etmək üçün gəldim, başqa seçimimiz yox idi. Heç nədən qorxmuram və sizi də qorxmamağa çağırıram”.
Mixail Saakaşvili ombudsman Nino Lomcariya ilə görüşündə necə saxlanılmasından danışıb. Onun sözlərinə görə, polis ona qarşı hər hansı güc tətbiq etməyib və özü də müqavimət göstərməyib:
“Saakaşvili bildirdi ki, onu bu gün yaşayış evində tutublar. O, müqavimət göstərməyib və polis də güc tətbiq etməyib. Saxlanılma zamanı o, tək olub və qapını da polisə özü açıb”.
Gürcüstan parlamentinin sədri Kaxa Kuçava isə M. Saakaşvilinin saxlanılması ilə bağlı xüsusi əməliyyatın yüksək səviyyədə həyata keçirildiyini deyib:
“Saakaşvilinin saxlanılması elə yüksək səviyyədə həyata keçirildi ki, bir nəfər də olsun xəsarət almadı”.
Onun sözlərinə görə, müəyyən strukturlar və idarələr Saakaşvilinin Gürcüstanda olmasını bilirdilər. Lakin bununla yanaşı, siyasətçilərin bəziləri bundan xəbərsiz idilər. Kaxa Kuçavanın fikrincə, bu, hüquq-mühafizə orqanlarının əməkdaşlarının düzgün addımı olub.
“Priveli” kanalı Saakaşvilinin Tbilisi yaxınlığındakı Rustavi həbsxanasında saxlanıldığını bildirib.
Saakaşvilinin saxlanılma görüntüsünü təqdim edirik:
Saxlanılandan sonra Mixail Saakaşvili qiyabi olaraq 9 il müddətinə azadlıqdan məhrum edilib. Prokurorluğun məlumatına əsasən, Saakaşvili bankir Sandro Girqvlianinin qətli və deputat Valeri Gelaşvilinin döyülməsi işi üzrə qiyabi məhkum edilib. O, birinci hala görə 3, ikinci hala görə 6 il azadlıqdan məhrum olunub.
Bundan başqa, M. Saakaşvili 7 noyabr 2007 -ci il müxalifətin mitinqinin dağıdılması, “İmedi” telekanalının dağıdılması və dövlət büdcəsindən vəsaitlərin mənimsənilməsi işlərində təqsirləndirilir. Hazırda bu işlərə məhkəmələr baxır, hələlik heç bir hökm verilməyib.
Mixail Saakaşvili həbsinə etiraz olaraq aclıq elan edib. Bu barədə ombudsman Nino Lomcariya Saakaşvili ilə həbsxanada görüşündən sonra bildirib:
“O, Gürcüstanda verilmiş hökmlə razılaşmır və özünü siyasi məhbus hesab edir”.
Mixail Saakaşvili saxlanıldığı 12 nömrəli Rustavi həbsxanasından məktub yazıb. O, məktubunda tərəfdaşlarını heç nədən qorxmamağa və sona qədər getməyə çağırıb. Saakaşvili eyni zamanda Rusiyanı da ittiham edib:
“Əziz yoldaşlar və çox sevdiyim gürcü cəmiyyəti, hər şeyi Kiyevdə qoyub bura gəldikdə bilirdim ki, böyük ehtimala görə, məni tamamilə uydurma, saxta hökmlərlə saxlayacaqlar. Buna baxmayaraq, mən gəldim, çünki öz ölkəmə və hər birinizə inanıram”.
Saakaşvili tərəfdaşlarını seçkilərə getməyə və qələbənin hər birinin əlində olduğuna inanmağa çağırıb:
“Sizdən çox xahiş edirəm ki, bir səs belə itməsin deyə hamı seçkilərə getsin və bundan sonra hamı birlikdə referendumun nəticələrini müdafiə etsin. Mənim və min qat daha vacib olan Gürcüstanın azadlığı tamamilə sizin aktivliyinizdən və yaxın günlərdəki döyüş hazırlığınızdan asılıdır. Beynəlxalq dəstək də həmçinin bundan asılıdır. Xahiş edirəm qorxmayın və qələbəmizin öz əlimizdə olduğuna sona qədər inanın”.
Gürcüstan Prezidenti Salome Zurabişvili keçmiş prezident Mixail Saakaşvilini əfv etməyəcəyini bildirib:
“Hamı qanun qarşısında bərabərdir. Çoxları soruşur, prezident Saakaşvilini bağışlayacaqmı? Cavab yeganə, sadə və qətidir – yox, heç vaxt”.
Zurabişvilinin sözlərinə görə, Saakaşvili Gürcüstana sabitliyi pozmaq üçün gəlib. Gürcüstan Prezidenti Saakaşvilini “onun rejimindən əziyyət çəkən insanlara qarşı dürüst olmaq” üçün bağışlamayacağını da sözlərinə əlavə edib.
Qeyd edək ki, 8 ildən sonra Gürcüstana qayıdan Mixail Saakaşvili parlamentin deputatı Valeri Gelaşvilinin döyülməsi və “Gürcüstan Birləşmiş Bankının” əməkdaşı Sandro Girqvlianinin öldürülməsi işi üzrə məhkəmənin üç instansiyası tərəfindən təqsirli bilinir.