Vergidən yayınmaqda və qanunsuz sahibkarlıqda ittiham edilərək həbs edilən sabiq deputat, “Quska” ləqəbli Hüseyn Abdullayev aclıq aksiyasına başlayıb.
Bu barədə jurnalist Əvəz Zeynallı məlumat paylaşıb. O bildirib ki, 10 saylı cəzaçəkmə müəssisəsində saxlanılan Hüseyn Abdullayev ona verilən 6 il müddətinə azadlıqdan məhrum etmə cəzasına etiraz olaraq aclıq aksiyası keçirir.
İttihama görə, H.Abdullayev külli miqdarda məbləğdə vergiləri dövlət büdcəsinə ödəməkdən yayınmaqda, qanunsuz sahibkarlıqda təqsirli bilinir.
Həmçinin H.Abdullayev dəfələrlə Almaniyadan istifadəsində olan telefonla “Autist Uşaqların Reabilitasiyasına Kömək” İctimai Birliyinin sədri Elnur Məmmədova zəng edərək onun və ailə üzvlərinin ünvanına nalayiq ifadələr işlədib, tələblərinə əməl etməyəcəyi halda onları məhv edəcəyi ilə hədələyərək icarə müqaviləsi şərtlərinə görə hər ay ödəməli olduğu 3 min manat icarə haqqı əvəzinə onun nümayəndələrinə 6 min manat pul ödəməsini hədə-qorxu ilə tələb etməkdə günahlandırılıb.
Qeyd edək ki, H.Abdullayev həbsinin ədalətsizlik olduğu üçün Azərbaycan vətəndaşlığından çıxarılması barədə bir neçə gün öncə ölkə rəhbərliyinə müraciət edib.